(सारतेत्) : जाहेर थान दो़ संताल हो़पो़नाक् मित् सो़नो़त् आनाक् जायगा कान ताकोआ; ओ़का रे दो़ संताल हो़पो़न को पुजा़ - पासाना आर बो़ंगा - बुरू ठेन को नेहो़र - आ़रजीक्आ जेमो़न आकोवाक् जियो़न सुलुक् निरा़य ते खेमाक् ताको बाड़े। ओ़ना सांव ते बो़ंगा - बुरू हो़ं को सारहाव तो़रा कोआ।  जाहेर थान दो़ आतो़ रेयाक् कुल्ही मुचा़त् टो़ठा रे ताहेंनो़क् कान ताकोआ आर जाहेर रे दो़ आयमा लेकानाक् दारे को ताहेंना। ओ़ने ओ़ना दारे रेयाक् मो़ज हिसित् हो़य - बातास गे आतो़ सेच् चालाक्आ; मेताक् मे दारे - ना़ड़ी रे ताहेंन रेहेत् रान रेयाक्  गुन - पुन गे आतो़ सेच् हो़य चालाक् ते आतो़ रेन हो़ड़ दो़ माराङ - माराङ रूवा़ - आजार खो़न रुखिया़ को ञाम एदा। संताल हो़पो़नाक् आतो़ सो़र रे जाहेर थान ताहेंनो़क् कान ते पुरहु हो़य ताला आक्सीजन रेयाक् ओ़ज दो़ बा़ड़ती गे ताहेंनो़क् काना; ओ़ना सांव ते मानवां आकोवाक् हो़ड़मो़ रे रूवा़ - आजार सांव ला़ड़हा़य ला़गित् हो़ड़मो़ रे दाड़े हो़य बा़ड़तीयेत् ताकोआ। ओ़नका लेका तेम मेन दाड़े केया जे सा़री गे जाहेर थान दो़ एकेन पुजा़ - पासा जायगा सुमुङ दो़ बाङ काना। मेताक् मे जाहेर थान रे मेनाक् दारे - ना़ड़ी को खो़न दो़ संताल हो़पो़न आकोवाक् हो़ड़मो़ ला़गित् आयमा पो़रहो़ को ञामेत् काना। ओ़ना तेगे हो़यो़क्आ पासेच् संताल हो़पो़न दो़ आ़डी कोम गे माराङ - माराङ रूवा़ - आजार रे बाको पा़ड़ाक् काना।